Skouda rajuona savėvaldībė – vėina ėš trīlėkas, katruos 2024-ūsius paskelbė Žemaitėška rašta metās. Ta spalė–lapkrėstė mienesēs Skouda rajuona savėvaldībės pariedīmo R. Granauskė vėišuojie bėbliuotekuo pėrmadėinēs bova žemaitiu kalbuos pamuokas.
Sosėrinkosė̄jē liuob torietė po dvė pamuokas. Vėina liuob būtė skėrta žemaitiu kalbuos gramatikā, kėta – žemaitėškā literatūrā, šnekamājē kalbā... Truopniau sakont, žuodīnou tortintė. Tam liuob pasėtarnautė nomū darbā. Ėr kuo tik nereikiejė padėrbtė!.. Savuojie aplinkuo gėrdietus, vartuotus priežuodius, patarlės, vadėnamūsius cėnzūrėnius keiksmažuodius prisėmintė... Sėnuonimu kuokem veiksmažuodiou prėrinktė... Net po žemaitėška ketoreili sokortė. Vo par pamuokas muokėnē liuob rašītė dėktantus, verstė ėš lietuviu bėndrėnės kalbuos i žemaitiu ėr ontrēp... Vėsė kopėtuo kortė istuorėjė douto temo.
Nuors grīnā vėsė besėmuokontė̄jē, katrū omžios bova no 17 lig 80 metu, diel darba a kėtū nepasabniū aplinkībiu i pamuokas liuob sosėrinktė ne tonkē, anas lonkė 15 žmuoniū. Pėnkis nepraleidosius ni vėina pėrmadėinė par paskotėnė ėš 16-as pamuokū muokītuojė apduovėnuojė zalatītās žėnklelēs, katrūs pavaizdouts Žemaitėjės ėr žemaitiu sīluos simbuolis – meška. Vėns okatlīvs muokėnīs solaukė asablīva Žvinklė Pranė priza – kningas „Majednē“ so žemaitėškās eilieraštēs ėr Jonkauskė Ontės karikatūruoms. Kėtė gava po saldi padiekuos žėnkla.
Vo pamuokas vedusi Skouda rajuona savėvaldībės R. Granauskė vėišuosės bėbliuotekas Skaitītuoju aptarnavėma skīriaus vediejė, filoluogė, žemaitiu etnėnės kultūras puoselietuojė Zabitienė Dalė, kap muokītuojē ėr pristuov, no muokėniū gava kvietku. Ėr ne tik.
Tēp jau pasėtruopėjė, ka tarp tū, katrėi puora mienesiu kuožna pėrmadėini po puora adīnu muokies žemaitiu kalbuos, raduos tėkrū pastaruosės miegieju ėr keravuotuoju. Ta anėms tū pamuokū bova mažā: ne vėns sakė nuoris muokītėis ėr tuoliau.
Tuoki galėmībė būs: je tik atsėras bėnt pėnkė muokėnē, žemaitiu kalbuos gramatikas muokītėis ėr tarmėni žuodīna tortintė anėi galies ėr po Naujūju. Ta rēk registroutėis, ka dā priš Naujūsius galietom žėnuotė, a būs tėi pėnkė muokėnē, a ne. Nuognē kvėitamė ėr tėi, katrėi jau lonkė žemaitiu kalbuos pamuokas, ėr tėi, karėi tuo dā nedėrba, bet nuor psisėjungtė pri kompanėjės. Omžios ėr ėšsėlavėnėms nesvarbo – tik nuors. Registroutėis rēk lig Kaliedu, t. ī. groudė 24 d., elektruonėnio pašto dalia.zabitiene@svb.lt arba tilipuono +370 699 21 525.
