Vaserė 21 d. Skouda rajuona savėvaldībės Granauskė Ruomualda viešuojie bibliuotekuo pamėnavuojiem Tarptautėnė gimtuosės kalbuos dėina.
Jau torem tuokė tradicėjė, ka Skouda žemaitiu draugėjė Gimtuosės kalbuos dėinuos švėntie apduovėnuo tus versla imuoniu savėninkus, katrėi sava imuoniems soteik žemaitėškus pavadėnėmus. Šēs metās apduovėnuojėmu atsėjimtė bova pakvėistė drabužiu krautovės „Ontras ronkas“ savėninkā Duomarkaitė Guoda ėr Kaženauskis Duovīds. Padiekavuonė jaunėms verslėninkams iteikė Skouda žemaitiu draugėjės pėrmininka pavaduotuojė Sruogienė Bėrutė, vo simbuolėška siekmies talismana – „piningū miedi“ so geriausēs linkiejėmās iteikė Skouda žemaitiu draugėjės tarības narīs Vainuors Stasis.
Kėta svarbi Tarptautėnės kalbuos dėinuos tradicėjė – žemaitiu kalbuos dėktanta aptarėms ėr geriausē anou parašiosiūju apduovėnuojėms. Šēs metās vaserė 7 d. dėktanta rašė 49 žmuonis ėš Skouda ėr kėtū rajuonu.
Dėktanta rezoltatus aptarė literatu kluba „Nuojos“ pėrmininkė, puoetė, filoluogėjės magistrė, literatūroluogė, Lietuvuos rašītuoju sajunguos narie, dėktanta teksta autuorė Zabitienė Dalė. Ana pasėdžiaugė smarkē pageriejosēs rezoltatās; apduovėnuotė bova net 9 prizėninkā!
Geriausē parašiosėms apduovėnuojėmus iteiktė pagelbiejė Skouda rajuona savėvaldībės mers Gutauts Stasis.
Pėrmuosės vėitas paskėrtas Vaitkou Keistutiou ėr Stražinskaitē – Glinskienē Irenā.
Ontruosės vėitas atėdoutas Česnauskienē Genovaitē, Daubarienē Irenā ėr Zulumskītē Aušrėnē.
Tretiuosiems vėituoms pagerbtas Baranauskienė Silvėjė, Kaniavienė Marītė, Pokvītienė Virginėjė ėr Semenavičienė Adelė.
Gēra rėngėnė dalīviu nuotaika palaikė Skouda mena muokīklas muokėnē – birbīnėninks Juovīds ėr anuo sesutė ėš dainiavėma klasės Austiejė. Žemaitėška Untulė Edmunda teksta truopnē perskaitė 2023 m. regijuonėnė konkursa „Skaituom žemaitėškā“ tretiuosės vėitas laureatė Dargītė Muonika.
Dzūku tarmė parašīta sava kūrėni skaitė dailininkė, puoetė, Lietovuos rašītuoju sajunguos narie Muolītė – Lukauskienė Daiva. Savuos kūrības ėr miegstamuos puoezėjės tekstu paskaitė regijuonėniu konkursu „Skaituom žemaitėškā“ laureatės, rėnginiū vediejės Zubienė Adelė ėr Pauliuvienė Danguolė. Daug pluojėmu ėr klausītuoju jouka solaukė Žvinklīs Pranis (Zabitis Augenėjos), paskaitės sava jumuoristėnė baladė „Aple Keistuti ė Bėrota“.
Po rėngėnė vėsė galiejė draugėškā pabendrautė pri asablīvā skaniuos žemaitėškas patėikmenės.
