Balondė 26 d. Skouda rajuona savėvaldībės Granauskė R. vėišuojie bėbliuotekuo vėišiejė Akmenės rajuona atstuovā.  

Skoudėškē ėr akmenėškē solīga patikrintė, kor daugiausē Žemaitijuo akmėnū. Vėinė saka, ka Skuodė, kėtė – ka Akmenie. Pastaruojie akmėnū ne tik daug – anėi dā ė dėdėlē poikē apdėrbtė. Ciela akmėnėnė sėina stuov. Iš kėtuos posės veizont, Barstītiūs stuov didiesis kūlis, vėsuo Lietuvuo žėnuoms. Žėnuokėt, ka Skouda pusie dā ė kūlēs akmėnis vadėn. Vo kas gal suskaičioutė Muosiedė kūlius!.. Dabā ta būs: Skouds susijims so Akmenė. Diel tuo ė kvėitam keliauninkus padietė skaičioutė, kas baguotiesnis akmėnimis. Paveiziesem, kas kėitiesnis! 

Svetē bova dėdėlē nustebė, ka tėik daug kon tor sava bėndruomenē pasiūluotė Granauskė R. bėbliuoteka: gal skaitītė vėsuokiuoms kalbuoms, sosikautė šachmatu turnīrūs, paruodū salies paganītė akis i ekspuonatus, Kningas muziejou – pasėdžiaugtė vėsū Skouda kraštė gīvenusiu ė dėrbusiu žėnuomu šalie žmuoniū kūrības pavīzdēs, vo Pasaulė žemaitiu leidiniū fondė – iš vėsuos Žemaitėjės kėlusiu autuoriu. Vo kou jau berokoutė aple Učackė Vīgauda ambasaduorėnė bėbliuoteka – tuokiuos nikamė daugiau nier!.. Vākū literatūras skīriou svetē išmiegėna naujės technoluogėjės ė pasidžiaugė ožsėjiemėmu gausa. 

Ekskursėjė vedė Skouda rajuona savėvaldībės Granauskė R. vėišuosės bėbliuotekas dėrektuorios Grušos Juons. 

Prasėded skoudėškiu ėr akmenėškiu „Akmėnėnė dvėkuova“! Anuo laimies vėsė!