Vaserė 21 d. Skouda rajuona savėvaldībės R. Granauskė vėišuojie bėbliuotekuo žmuonis gausē sosėrinka švėntintė Tarptautėnės gimtuosės kalbuos dėinuos ėr žemaitiu kalbuos dėktanta jubėliejaus.

Sosėspėitėms pradiets Granauskė Ruomoalda žuodēs aple gimtoujė žemaitiu kalba – īrašo ėš anuo kningas „Švėntūju gīvenėmā“ prėstatīma 2013 m. vaserė 23 d. Vėlniaus kningu mugie.

So Tarptautėnė gimtuosės kalbuos dėino sosėrinkosius pasveikėna Skouda rajuona savėvaldībės mers Gutauts Stasis; Mažeikiu rajuona savėvaldībės administracėjės Koltūras, sporta ėr pavelduosaugas skīriaus vediejė Končiūtė-Mačiolienė Rūta, katra pėrma karta rašė žemaitiu kalbuos dėktanta; Seima narie, Laikėnuosės Žemaitiu gropės pėrmininkė Torauskātė Vėjuoleta; Seima narė Martinaitė Tuoma padiejiejė Gaižauskātė Deivida; kalbėninks, humanėtarėniu muokslu daktars Pabrieža Jūzaps.

Žemaitėšku dainū duovėnuojė Mažeikiu koltūras cėntra kvartets: Juokubauskis Remigėjos (kuolektīva vaduovs ėr koltūras cėntra dėrektuorios), Macėjauskienė Saluomiejė, Šakienė Muodesta ėr Vasiliauskis Alfreds. Skombiejė puora dainū, katras dabā dainiou Žvagolis Žėlvėns, vo aple 1990-ūsius dainiava mažeikėškiu gropė „Rakts“, ėr vėina vėsai nauji autuorėnė Juokubauskė Remigėjaus daina, aranžouta Dargė Ontuona. Nuors ėr dvijū pėrmūju žuodiu autuorios – Juokubauskis R., vo vėinuos – ėr mozėkas.

Kap skaituovā pasėruodė Mažeikiu koltūras cėntra Jozės Vaičkaus Skrajuojemuojė tetra artistā: Kokšts Jūzaps, pernā konkursa „Skaitīmā žemaitėškā“ Žemaitėjės regėjuona turė paugosiu žmuoniū gropie ožjiemės pėrma vėita, ėr Puocienė Irena, tamė konkursė pelniusi nuomėnacėjė ož skaitīma uoriginaloma. Anodo konsoltava tuo tetra režisierios, lietoviu kalbuos ėr literatūras muokītuos eksperts Jenuška Martīns. Ėš mūsa rajuona skaitė pernā Žemaitėjės regėjuona „Skaitīmūs žemaitėškā“ paugosiu žmuoniū gropie ontra vėita ožjiemusi Stasiolienė Indrė ėr tarp 5–8 klasiu muokėniū pėrms bovės Lazdauskis Airids ėš Muosiedė gimnazėjės, paruošts muokītuojės Nuoreikienės Dalės. Ons so Skouda rajuona savėvaldībės R. Granauskė vėišuosės bėbliuotekas Skaitītuoju aptarnavėma skīriaus vediejė Zabėtienė Dalė rėngėni ėr vedė.

Vėso pėrma apduovėnuotė tėi, katrėi prėdiejė daug pruocės, ka jubėliejinis – dešimtāsis – žemaitiu kalbuos dėktants solaukto 76-iū anou rašiosiu ėš Skouda, Plungės, Telšiū, Mažeikiu, Klaipiedas miestu ėr rajuonu, Koršienu, Palonguos, Švėntuosės, Naujuosės Akmenės, Rėitava, Šiauliū, Kauna ėr net Hamburga. Tėi žmuonis – jau mėnavuots Pabrieža Jūzaps, Mažeikiu rajuona savėvaldībės H. Nagė vėišuosės bėbliuotekas Seduos miesta bėbliuotekas vīresniuoji bėbliuotekininkė Monkevičiūtė Luoreta, Telšiū tretiuojė omžiaus universiteta dėrektuorė Joškienė Danutė, Telšiū rajuona savėvaldībės K. Praniauskātės vėišuosės bėbliuotekas Inuovacėju ėr muokīma cėntra vedies Grušos Edvards, Stepuonavīčienė Vida ėš Vėlniaus universiteta Šiauliū akademėjės Informacėjės cėntra, Viežātiu koltūras cėntra dėrektuorė, Klaipiedas rajuona žemaitiu draugėjės pėrmininkė Ciparienė Dijana. Vo Barnėškienė Rita ėš Plungės „Saulės“ gimnazėjės ne tik rašė pati, bet ėr sobūrė muokėnius – anėi pėnkė šimeta ėr bova vėinintelē dėktanta rašė jaunuomenės atstuovā. Kadangi ni vėina ėš dvijū telšėškiu nebova, duovėnas anėms pajiemė Telšiū rajuona savėvaldībės K. Praniauskātės vėišuosės bėbliuotekas dėrektuorė Zubienė Juolanta.

Tėms, katrėms lig nogalietuoju lauru šin karta bėškėlieli prėtrūka, skėrtas nuomėnacėjės „Ož pastongas“: Česnauskienē Genuovaitē ėš Rėitava, Gedgaudou Praniou ėš Šiauliū, Kaniavienē Marītē ėr Lekniovienē Danutē ėš Skouda rajuona, Irenā Stražinskātē-Glinskienē ėš Plungės rajuona. Nuomėnacėjė „Ož drousa“ –

žemaitiu kalbuos dėktanta rašiosem aukštaitiou Gečou Algimantou ėš Klaipiedas rajuona. Nuomėnacėjė „Ož ėštėkėmībė“ pelnė vėsus dėktantus rašiosės Skouda rajuona laikraštė „Mūsa žuodis“ redaktuorė leidiejė Kaniavienė Marītė ėr Skouda rajuona savėvaldībės R. Granauskė vėišuosės bėbliuotekas vīriausiuoji metuodėninkė Srougienė Bėrota.

Padiekas ėr nuomėnacėjės iteikė Skouda rajuona savėvaldībės R. Granauskė vėišuosės bėbliuotekas dėrektuorios ėr Skuoda žemaitiu draugėjės pėrmininks Grušos Juonis. Vo dėpluomus geriausē parašiosėms dėktanta anam iteiktė padiejė Pabrieža Jūzaps. Geriausē parašė – ožvės mažiau klaidū padėrba – jau mėnavuota Barnėškienė Rita ėš Plungės ėr Kubelskienė Stanislava ėš Švėntuosės. Vo raštingiausė žemaitē do: daukšėškė Luožienė Aušra ėr plungėškis Vaitkos Kēstutis. Tėms ketorėms duovėnū toriejė ėr Seima narie, Seima narė padiejiejė, Skouda rajuona mers.

Rėngėnīs, katrou sorėktavuojė Skouda rajuona savėvaldībės R. Granauskė vėišuoji bėbliuoteka so Skouda žemaitiu draugėjė, ožbėngts žuodēs: „Kol mūsa žmuonis būs prėsėrėšė pri sava kalbuos ėr anuos laikīsės so meilė, tol lėks ėštėkėmė sava tėkiejėmou, anū dūšies nevīks pasietė pėktuos sieklas“. Tēp pasakė vīskops Valončios Muotiejos Kazėmiers, katruo metās Lietovuos Respublikas Seims paskelbė 2026-ūsius.

Paskiau vėsė pakaštavuojė žemaitėškas patėikmenės, katruos parūpėna Skouda žemaitiu draugėjė.