Artiejėnt Tarptautėnē gimtuosės kalbuos dėinā, katrou pruovėjem vaserė 21-uo, Skouda rajuona savėvaldībės Ruomoalda Granauskė vėišuoji bėbliuoteka so Skouda žemaitiu draugėjė kvėit rašītė žemaitiu kalbuos dėktanta. Šimeta tou dėrbuom jubėliejini – jau dešimtouji – karta.
Kap ėr onkstiau, šimeta galiejė rašītė Skouda rajuona savėvaldībės Ruomoalda Granauskė vėišuojie bėbliuotekuo arba veizont tėisiuogėnė transliacėjė interneta suocialėnė tinkla „Facebook“ šiuos bėbliuotekas paskīruo. Tėi, katrėi rašė, veiziedamė dėktanta transliacėjė internetė, par 30 mėnotu po anuos toriejė atsiūstė teksta „Word“ formato arba noskenouta, nopaveikslouta ronko rašīta varijanta elektruonėnio pašto.
Kuožna meta dėktanta raša žemaitē ne tik ėš Žemaitėjės, bet ėr ėš kėtū Lietovuos regijuonu, net ožsėinė. Pasėtruopėi ėr vėns kėts sava sogebiejėmus žemaitiu kalbuos rašībuo benuoris ėšmiegintė aukštaitis.
Vaserė 5 d. žemaitiu kalbuos dėktanta rašė ne tėik daug, kap pernā – 85, bet vės tėik šmuots žmuoniū – 76: 16 vėituo, t. ī. Skouda rajuona savėvaldībės Ruomoalda Granauskė vėišuojie bėbliuotekuo, vo dā 60 darbus atsiuntė elektruonėnio pašto. Be ketoriū Skouda rajuona gīventuoju atsiuntė žmuonis ėš Plungės, Telšiū, Mažeikiu, Klaipiedas miestu ėr rajuonu, Koršienu, Palonguos, Švėntuosės, Naujuosės Akmenės, Rėitava, Šiauliū, Kauna ėr net Hamburga. Pagal rajuonus, kap ėr prėstuov, pėrmau Skouds – ėš vėsa rašė 18 žmuoniū. (Nuors galiejė ėr toriejė rašītė daug daugiau: kuožnam Skouda rajuona savėvaldībės tarības nariou bova nosiūsts asablīvs kvėitėms ėr i trumpūsius žemaitėškas rašības muokīmus, katrėi bova sausė 29 d., ėr i dėktanta, bet... Muokīmūs nedalīvava ėr dėktanta nerašė ni vėns. Vo tas dėdėlē gerā paruoda Skouda rajuona valdžiuos puožiūri i Skouda kap žemaitėškiausė rajuona ėr vėsa istuorėnė Žemaitėjės regijuona savastėis ėškeravuojėma.) Kadani tarp 16-as rašiosiu Ruomoalda Granauskė bėbliuotekuo do bova ėš Salontū, pri dėktanta geuograpėjės rēk prėdietė ėr Kretinguos rajuona. Tuoliau rėkioujės Mažeikiu rajuons – Mažeikiu Henrika Nagė vėišuosės bėbliuotekas Seduos miesta bėbliuotekuo rašė 13 žmuoniū, vo Telšiū rajuona savėvaldībės Karuolinas Praniauskātės vėišuojie bėliuotekuo – 11. Šin karta tarp rašiosiu žemaitiu kalbuos dėktanta tik pėnkė muokėnē. Vėsė ėš Plungės „Saulės“ gimnazėjės. Nuors ėš Skouda kėlės kalbėninks dr. Pabrieža Jūzaps gimtouji rajuona laika žemaitiu kalbuos tvėrtuovė, tuo rajuona muokėniū dėktants nesoduomėn.
Kuožna meta dėktanta teksta paraša šiū eilieliu autuorė – filoluogė, literatūroluogė, Žemaitiu kultūras draugėjės prezidiuma narie, Skouda rajuona savėvaldībės Ruomoalda Granauskė vėišuosės bėbliuotekas Skaitītuoju aptarnavėma skīriaus vediejė Zabėtienė Dalė. Ana dėktanta ėr padėktou, vo paskiau ėštaisa rašiosiūju darbus. Šimeta dėktants bova aple dėktanta.
Dėktanta dalīviu sogebiejėmā vertėnamė, atsėžvelgont i kalbėninka dr. Pabriežas Jūzapa veikalė „Žemaitiu kalba ėr rašība“ ėšdiestītas šiuos kalbuos gramatikas taisīklės. Tad ons sosėrinkusius rašītė dėktanta ėš Vėlniaus universiteta Šiauliū akademėjės bėbliuotekas, kor rašė kelė šiaulėškē, per nuotuoli ėr pasveikėna.
Vaserė 21 d. 13 val. Tarptautėnē gimtuosės kalbuos dėinā skėrtamė koncertė, katras būs Skouda rajuona savėvaldībės Romoalda Granauskė vėišuojie bėbliuotekuo, padėrbė parvės mažiau klaidū būs apduovėnuotė. Nuors i tou koncerta kvėitam ne tik rašiosius dėktanta ėr ne tik žemaitius. Šimeta rėktavuojint tou švėntė prikimb Mažeikiu kultūras cėntros. Ta būs pruoga regietė ėr gėrdietė ne tik Jozės Vaičkaus Skrajuojemuojė tētra artistus, bet ėr pati tuo cėntra dėrektuorio Juokubauski Remigėjo so pamuočninkās. A žėnuojiet, ka keliū dainū, katras dainiou Žvagulis Žėlvėns, pėrmāsis atlėkies īr vėsai ne ons? Nežėnuojiet?.. Atēkėt, atvažioukėt pasėveizietė ėr pasėklausītė – sožėnuosėt!..
